مدونة ادبية: تجمع  بعض قصائدي المتواضعة من الشعر الشعبي ؛ آمل أن تنال اعجابكم

القصيدة هي إيحاءات من الاعماق تتشكل في آفاق واسعة من الخيال.. فتصبح غذاء للروح" علي

الثلاثاء، 26 أكتوبر 2021

خل بالك ياقصيدي

خل بالك ياقصيدي

خـلْ  بـالـك  ياقصيـدي

كل  ما  مـزنك   تـهاما


نابـي   التـلّـعات    دمّـه
...خـلّ   نابيـها  يتـزاما 

يـوم   تطمـرها    تلاطم
...جـاذبـيّـه    و انـعـداما

...وان  تسّـنـدها   تهيّـف
...من  تنافـرها    تـطاما

كـل مـا  راجت   تراوج
خافقي   صابـه   فصاما 

يـا  هـلا بـك  يـا وليفي
عّـد  مـا  لـبّا   و صامـا

من  سموحروف شعري
عذبها    جاك   يتـواما

يا  دوا  كـل  المواجع
لـيّ ما غـيرك   مـراما 

اجعلي فـيّ  الـذوايـب
من حمم شوقك تـراما

غـيبينـي   فـي  غمامك
وآرفعك  فوق  الـغماما

و استبيحـي  كـل  مابي
لا غفـىَ  ليلـك   و نـاما 

كـّم تـضماك  المشاعـر
و افـتقـدك  الشوق ياما

خاطري لاضاق شـوقك
بـ القصايد لك   تـسامى

والله   اني  يَ  الكريمه
مَ  انحنى لي  قط  هاما


ينطح  الجوزا  شموخي
والتوي  الجدي احتشاما 

لا  تهمي  الوقت   دامة
ليّ   في   الدنيا   مقاما

كـلها   الدنيا   فـدا  لـك
و كل ما  جابت  حطاما















كسر النفوس

اول رساله في عيوني كبيره
افكها في شوق، واترك سواها

ياعل بشرى خير، وتكون خيره
واقول ياجي الخير فالي وراها

شوفك رضيته لو لمده قصيره
لوما تمل العين شوفك. كفاها

ادراك عن ريبة عيون,, حقيره
ولا احتمل نظرة تبين خفاها

لكن  رحيل بلا موادع.. كبيره
في حق من روحه بيدك دواها

حتى الرسايل قلها من كثيره
صارت بلا معنى فقدنا حلاها..

لاخان. شوفك يالعيون الضريره
وش لزمته لاصار يشبه عماها

يانفس لوعشتي حياتك كسيره
كسر النفوس.. ولامهونة هواها

الأحد، 28 مارس 2021

الخوة

الله على الفطره خلقنا حمدناه
فيها  العلوم  الطيبات  الجليله

الطيب راس الخيرباصله ومعناه
للي  يسوي  الخير  ما يرتجيله

من سامنا بالطيب بالطيب سمناه
نوفي مع الوافي ونحفض جميله

والي شرانا  طيب  حنا شريناه
نعد  مثله  راس مال  وحصيله

ذا ورثنا  من عقب اهلنا ورثناه
وحق علينا  ورث  اهلنا  نشيله

مني  سلام الله  بكامل تحاياه
للي  رقى للشامخات  الطويله

ابو فهد  ياحي  ذكره  وطرياه
وياحي حرب وحي ذخر القبيله

الضيف لاجا  بالتراحيب يلقاه
طلق المحيا ضيق صدرك يزيله

راعي دلال فوق  ناره محاراه
صنعة  يمين  للمراجل طويله

يطرب لها راس هجوسه تبلاه
تذهب عماسه والهواجس قتيله

في مجلس للعز ساسه ومبناه
مافيه ماطى للنفوس..العليله

انشهد  ان الي تعزوا  بشرواه
هم  النوايب والدهر مايشيله

كن الكرم مزروع في كف يمناه
وكن الوفى له ربع واهل وقبيله

لاصار فيه المدح ياضعف مبناه
عنده  تعود  كل  جزله  هزيله

يا خوة . . ترقا بها  للمضاهاه
والا  عساها  للعدم  والخذيله

الأربعاء، 21 أكتوبر 2020

السآري


             لآ وين  يالساري  دروبك طويله
ياكم   تغنى  للمساري  مواويل

في  خاطر  العابر   سوالف  ثقيله
تروي  حكاية  غربته  هدة  الحيل

ليه الهوى  يسرق  من  الفرح  ليله
وليه انطفى من صفحة الليل قنديل

في ضحكة البردان صوره بديله
فيها انعكاس آلآم  وآثار تنكيل 

منها خذت وصفات جرحه وسيله
للهمس في عين المسافر تفاصيل

دام  الأماني  في عيونه  قتيله
وصدر الهقاوي حطمت به تراتيل 

اصبحت مابين الأمل والخذيله
ترقب خطاوي روحته والمقابيل

لو يطلق الساري مع الريح خيله
لاعود الساري ولا عود  الخيل

الاثنين، 23 ديسمبر 2019

مازاد كثر النوم

مازاد كثر النوم في عمر الانسان
وكثر السهر ماينقص بعمر راعيه

ما يسهر  الا فاقد  عز خلان

جرحه عميق ولالقى من يداويه

والا صويب سهام مدعوجة اعيان

كنه على جمر اللضى مادرت فيه

والا كريم غادر السوق خسران

هايم يدوج ومدفع الدين يرميه

يالايمي مادامني عنك في شان

عني تنحى خل عنك المشاريه

للجنة  ابواب  وللنار  بيبان

وكل له اعماله تحدد مواطيه

السبت، 27 ديسمبر 2014

الجمره الخبيثه

اقاوم اهوال الزمن حرب وسلوم

وصـراع  وقت مـاقـوينا صـراعـه

 

همـوم اساهرها  وتلـعبّي همـوم 

كنـي محــارب تعتليــه الشـجـاعـــه


يقدم صفوف الجيش في غزوة الروم 

يجيد في خـوض الحـروب البـراعه


لكـنّ صـابه في الظّهـرعدة سهــوم

واعداه فرحـوا يـوم طاحت ذراعـه


خـلّـوه لامـيّت.. ولا حـيّ ويـقــوم

شـاهد نهاية سطـوته وانـدفـاعــه،


الـبارحــه بـيّحت ماكـان مكتــوم

في خاطـري والصـدر فجـه ولاعـه

 

وتضـاربت في راسـي افكـار وعلوم

تـيّـارها شــوّش علـيّ انقطـاعــه


واستلهمه ذهنـي حسـابات و رقوم

حسيت هـول الفاجعه والفضاعه


وقامت بي الدنيا على كبرها تحوم

والفكـر هيّـض شي بالوقت راعـه


راعه مـروّع كـل فكـر  ومفهوم

فكـر الضّـلال مفرّقيـن الجماعـه


لعبه حقيره جـوفهـا دسّت سمـوم

صنـع اليهود وصدّروها بضـاعـه


مستعبدين الصّهينه للعدا خدوم

ابليس منّاهم و راحوا تبـاعـه


الا الوطن؟ غالي تـرابه ومحشوم

عــن الـخيـانه  زاده الله مـناعـه


من يوقض الفتنه بالوزار ماثوم

وملعـون من رب خلقنا لطاعـه


ماحلّ سفك الدّم في الشرع يا قوم

دمعة يتيم اش ذنبها في ضياعه


وصيّة شفيع الخلق في ذلك اليوم

بلّغ بهـا فـي يـــوم حجّـة وداعـــه


يكفي مصايب ليت بحمولها تقوم

ويكفي جراح امة محمد بشاعه 


افعى بعدة روس تكثر من الحوم

متربضه  للشر  وقت  اندلاعه 


والقدس تصـرخ في بحر دمّها تعـوم

قتل ودمار وهتك عـرض ورواعـه


ارواح تزهق مامن شفاق ورحـوم

حتى الصغار الي بعمر الرضاعه


والعدل في هذا الزمن شبه معدوم

الا  شعـارات  الحيَـل  والخداعــه


يناصرون الظلم و يدان مظلوم

يدارون مغـزاهم بكيد ولكـاعـه


يجيدون فنّ الكذب في خبث ملغوم

عبـر  الأثيـر  وفبـركات  الاذاعــه


ستين حول وعـودهم ما لها حـوم

ضاقت بنا كـل الحيَل والضراعه


لامن رقعنا شق زادت بها خـروم

والشــق مالـه في زياد اتسـاعـه


جمره خبيثه حطّت بوسط بلعـوم

تنثر سموم الحقد في كـل ساعه


لكن طال الدجى الصبح بقدوم

لابــد مـا يلفي يسـابــق شعـاعــه


مـاكان يوم الخير للّشـر محكوم

الخيــر يبقـى دوم فارد شـــراعه


وللشر يـوم يكون مدحـور مهــزوم

خاسي حقير بغصب و الا طـواعه


ماقد بناه الشّـر مهدوم مهـدوم

تهدم حصـونه لو حمتها قلاعـه


دوّنتها يوم انّ جفني جفاالنـوم

عيّـا يغمّض والـملا في هجاعـه