الجمره الخبيثه

اقاوم اهوال الزمن حرب وسلوم

وصـراع  وقت مـاقـوينا صـراعـه

 

همـوم اساهرها  وتلـعبّي همـوم 

كنـي محــارب تعتليــه الشـجـاعـــه

يقدم صفوف الجيش في غزوة الروم 

يجيد في خـوض الحـروب البـراعه

لكـنّ صـابه في الظّهـرعدة سهــوم

واعداه فرحـوا يـوم طاحت ذراعـه

خـلّـوه لامـيّت.. ولا حـيّ ويـقــوم

شـاهد نهاية سطـوته وانـدفـاعــه،

الـبارحــه بـيّحت ماكـان مكتــوم

في خاطـري والصـدر فجـه ولاعـه

 

وتضـاربت في راسـي افكـار وعلوم

تـيّـارها شــوّش علـيّ انقطـاعــه

واستلهمه ذهنـي حسـابات و رقوم

حسيت هـول الفاجعه والفضاعه

وقامت بي الدنيا على كبرها تحوم

والفكـر هيّـض شي بالوقت راعـه

راعه مـروّع كـل فكـر  ومفهوم

فكـر الضّـلال مفرّقيـن الجماعـه

لعبه حقيره جـوفهـا دسّت سمـوم

صنـع اليهود وصدّروها بضـاعـه

مستعبدين الصّهينه للعدا خدوم

ابليس منّاهم و راحوا تبـاعـه

الا الوطن؟ غالي تـرابه ومحشوم

عــن الـخيـانه  زاده الله مـناعـه

من يوقض الفتنه بالوزار ماثوم

وملعـون من رب خلقنا لطاعـه

ماحلّ سفك الدّم في الشرع يا قوم

دمعة يتيم اش ذنبها في ضياعه

وصيّة شفيع الخلق في ذلك اليوم

بلّغ بهـا فـي يـــوم حجّـة وداعـــه

يكفي مصايب ليت بحمولها تقوم

ويكفي جراح امة محمد بشاعه 

افعى بعدة روس تكثر من الحوم

متربضه  للشر  وقت  اندلاعه 

والقدس تصـرخ في بحر دمّها تعـوم

قتل ودمار وهتك عـرض ورواعـه

ارواح تزهق مامن شفاق ورحـوم

حتى الصغار الي بعمر الرضاعه

والعدل في هذا الزمن شبه معدوم

الا  شعـارات  الحيَـل  والخداعــه

يناصرون الظلم و يدان مظلوم

يدارون مغـزاهم بكيد ولكـاعـه

يجيدون فنّ الكذب في خبث ملغوم

عبـر  الأثيـر  وفبـركات  الاذاعــه

ستين حول وعـودهم ما لها حـوم

ضاقت بنا كـل الحيَل والضراعه

لامن رقعنا شق زادت بها خـروم

والشــق مالـه في زياد اتسـاعـه

جمره خبيثه حطّت بوسط بلعـوم

تنثر سموم الحقد في كـل ساعه

لكن طال الدجى الصبح بقدوم

لابــد مـا يلفي يسـابــق شعـاعــه

مـاكان يوم الخير للّشـر محكوم

الخيــر يبقـى دوم فارد شـــراعه

وللشر يـوم يكون مدحـور مهــزوم

خاسي حقير بغصب و الا طـواعه

ماقد بناه الشّـر مهدوم مهـدوم

تهدم حصـونه لو حمتها قلاعـه

دوّنتها يوم انّ جفني جفاالنـوم

عيّـا يغمّض والـملا في هجاعـه 

وجه المرايا

ضوك تﻻشى واختلط بالفيه

واشوف شمسك نورها عسماني

خوفي  ظﻻم  الليله  المنسيه

يغشاك  وتدور  وﻻ  تلقاني

احذر  تحاول من  ذراعي ليه

عاصي  و مقبل لية  الذرعاني

لي  عزة   عليا   عن  الدونيه

النفس ماترضى المقام الداني

غلطه   و لكن  اعتبرها  ميه

غامرت  في غفلة  ذكاي وخاني

ما لي  علم..  بخافيات  النيه

وان الهوى في نشوته وهماني

خايلت  غيمه  جنبت  وهميه

ما بللت  حتى  فروع اغصاني

تحلم  بجنه   لونها   ورديه

ودي،  ولكن  معذره  ممداني

خل  الستاير  دامها  مرخيه

ريح الورى ﻻتحرق  البستاني

معاد  فيه، كافي  الي  فيه

همي  مﻻزمني  الين  اوذاني

ماعدت افرق  بين ذيك وذيه

تخالط عليه في الظﻻم  الواني

ياحاضري ومستقبلي وماضيه

يا  حلمي  الي  تايه   العنواني

حفيت دروبي من خطا رجليه

ﻻني  وصلت وﻻ مرادي  جاني

وجه  المرايا  شفت به  ماريه

دايم   تقلب   ذاكرة   نسياني

الين   قلت   مروضين  الحيه

 سلطهم  الي  راكبه  شيطاني

به   علة   مستكبده   مخفيه

يكوي كمدها  في ضلوع الجاني

استغفر الله  من  ظنون  السيه

 صديت  ظني مير  هو  يعصاني

صابر  على  حكم  المقدر ليه

عسى يعوضني الولي باحساني

دنيا  تقلب   مثل  ذيل الحيه

هي   للزوال  ومن  عليها  فاني

عذاب الروح

انا  الشقا اللي  ما عرف  مثله   الناس
و  آنا   عذاب  الروح  لو   يعـرفـونـه

آنا   ولادة   حلم   بـ عيون   عمّاس
و الحال  من  شافه   يشوف   المهونه

وآنا   مدينةْ  هم   من  دون حراس
وانا  وطن  واعداه  دكوا  حصونه

آنا  الوجع  وآنا سرابيل  الاتــعاس
و آنا   حكايــة  لغز ما  يـفهمـونــه

الكون  ضايق بيّ   مخنوق    الانفاس
تصافق  براسي واقعه مع   جنـونــه

المسرحية

يالله دخيلك من عنا الجرح لاظك. 

جرحي لعبي لعبة الدودحيه.. 

ياما بغيت انفك لاكن مافك.

لينه تاكد من نفوق الضحيه.. 

.  .  . 

تالي مباني ودنا دكها دك، 

مادمت ناوي لا تخلي بقيه.. 

تبرى الجروح انكانها تسلم الحك. 

وجروح تبقى مابقى العمر حيه..

كم لي عايش بين الاوهام والشك،

واثره يغيض ايامه السود بيه.. 

الين بيبان الأمل لكها لك.

 واسدل ستار مشاهد المسرحيه..

ياحـزينـه

ياحزينه"

يا حزينه  وين  ذاك  النور  وينه
خاطر  المكلوم  لا   لا   تكسرينه

كم شكى ليل المواجع من  عذابه
كل مايغشى السهر هجر السكينه

الحزن   ريحه  تذاريها   ذواري
وخافقي   يهوى  رياح  معذبينه

لو ذبحتي عاشقك  مره! عوافي
لكن  انتي  الف   مره  تذبحينه


ياحزينه"

حطمت كلمه   امانينا   و ماتت
واستفاق الحلم من غفوة سنينه

فرقتنا   فالهوى   كثر   المواني
عقب كنا اثنين في نفس السفينه

عقب نورك غاب عني يا حزينه
غاب شوفي وانطفى نورالمدينه

اذكريني لا  رخا  ليلك   ستاره
واذكريني لا غشى قلبك  حنينه

وان ذكرتيني وجابك لي حنينك
الوفى باقي   على   ما تخبرينه"


وآآآهـ من ليل المواجع!!

ياحزينه