المتمرده

شقت ستارالليل صرخـة  وليـدة عليها من انوار الفضيلـة  قلايـد

تشبه زلال الما من الزيـن بيـدة تروي ضما كل العـروق النوايـد

البدر نوره مـن حلاهـا  تزيـدة مستعصية بخلاف ما كـان سايـد

ان كان قفّت فـي بهاهـا عميـدة وكان اقبلت تقدم صفوف العمايـد

وان وقفت مـا طاولتهـا  نديـدة تحرق كروت الشامخات  الندايـد

أدّق من حـد السيـوف الحديـدة فالحق ما ترضى بـدور المحايـد

جبار الارض تشب فيـه الوقيـدة واللي رضوبه للطواغيـت  قايـد

متمـردة تعلـب علـى ماتريـدة على هوى محبوبها ويـش رايـد

تطوي مدارات النجـوم  البعيـدة واتحطني فوق الطـوال  البعايـد

عنيد عاشق لـه خلـوجٍ  عنيـدة حضه رمابه فالصعـاب  العنايـد

ما مال مع هب الريـاح الشديـدة لا زال مثل الراسيـات  الشدايـد

ينقا مـن الـدر الفرايـد  فريـدة يشـر وتاجيـه الفرايـد  فرايـد

تعانق هموم اهل القلوب  النكيـدة فيها دوا للي بـه الجـرح  كايـد

وتنشر مفاهيم الصفـات الحميـدة واتنبه الي عـن طريقـه تحايـد

وتزع ورود المقبـلات  الجديـدة في روض خصبات السنين المجايد

وتنسج خيوط الصبح في يوم عيدة واتلبس الفرحـه ثيـاب  المعايـد

استرجاع السفير

شفت قفرات الديار مربعه والسيل سال
والخصيبه جف ماها عقب كانت مربعه

المعالم والشواهد واضحه مثل الهلال
والنوايا  مبهمات  محصنات  مقنعه

بايع التنباك محصوله يضن انه حلال

ما درى انه يضرم النار الوقيده باضلعه

من يستحي من بنت عمه ماتخلف له عيال
والذي   ما يستهم  الوقت  وقته   يخدعه

يوم دورت الموالي عند ميل الوقت مال
راغ عني مثل حصني شاف راعي وافزعه

رحت اصحي النايمين وأنهم في خس حال
ضاق صدري واستضاق فجوجها عقب السعه

جيت اقلبها يمين وجيت اقلبها شمال
وأنها  الثنتين   يادفع   البلا   متقطعه

انتهت  كل  العلوم  الي  موثقها  رجال
بانقض الميثاق الاول وان عصاني بقطعه

من يخليني قفا باصرف عنه وجه القبال

ومن حقرني باحقره واطلب من الله يقلعه

التمرد  باعلنه  وارسم   حدود   الانفصال
والجم ابواب السفاره والسفير  استرجعه

القناعه  كنز  فيها  عزة  نفوس  الرجال
والنفوس  أنواع  كلٍ  في  هواها  تتبعه

آهـ من حضٍ  بلاني  لايشيل  ولايشال
الوكاد  ان  القراده  أمه  إلى  ترضعه

كل  ما همٍ  تلاشى  قالي  همٍ   تعال
كم  تلوى  بي  همٍ  واحتواني  باذرعه

جيت بامشي من مكاني وان خطواتي ثقال
والفيافي  المقفره  مال القطيعه  مقطعه

مازرعته في سنيني ذاب في يبس الرمال

ولا جنى  الفلاح  فود  الا تعب  ما يزرعه

هوني  يانفس  روعك  دام  تاليها  زوال
كل  نفسٍ  زايله  والعبد  لـ الله  مرجعه